كتبها صديقي: أسامة
سمسم ده يا خوانا م الآخر زيي وزيك بيحب الهزار زي عنيه وبينتهز أى فرصة
للضحك ....المهم رجع من الشغل وبعدها عمل الشوبينج المعتاد بتاع أول كل
شهر وروح ع البيت .....اتخنق .... قال اروح أقعد ع القهوة مع برتيتة الأنس
سمسم : سلام عليكوا يا رجالة
الشــلة : أهلا يا عم الأمور , أقعد .... اتنين يك يا حرارة ... ايه ده انت معاك
كام يك ؟ اسحب من بره يا جميل .... هات أم جوهار يا جميل
سمسم : يا خوانا عايزين نعمل حاجة مفيدة
الشـلة : مفيدة .... هو فيه أحلى من الدومينو .... حاسب يا ضخم ... حنسرق ؟
سمسم ... بتكشيرة : يارجالة مش كده , بجد أنا عمرى ما شفتكم بتتكلموا فى
حاجة عدله ايه رأيكم أنا عايز أكتب عن الوحدة العربية ؟
الشلة : الوحدة !!! اه والله بجد الوحدة صعبة ... كلم يا هاني , سمسم بيقولك
الوحدة العربية نيها ها ها ها ....والنبي تنقطنا بسكاتك , حتلعب النازلة وللا ايه ؟
سمسم : يارجالة بجد انتوا ليه سلبيين كده , انتوا مش حاسين بالبلد وللا ايه ؟
الشلة : عم زفت ارحمنا , يا تقعد ساكت يا تروح ... وحدة عربية ايه وقومية
ايه ... قوم روح
سمسم : تصدقوا عندكم حق .... ماهو مفيش فايدة صحيح , ما مليون واحد كتب
واحنا نسخن شوية على الكلام وبعد ما الكلام بيخلص وكأن شيئا لم يكن , بس أنا
يا شباب عايز أكتب
... مقاطعة ...
الشلة : ارحمنا واسكت , وحدة وقومية وعايزين نغير ... اسكت بالله عليك
سمسم : أنا مش عايز أكتب عشان أغير , مجرد كتابة بس , مجرد اثبات وجود
ورأى نكتب عشان الأجيال اللى جاية تعرف ان كان فيه أحياء عايشين قبلهم مش
نبقى جيل فقر كده
الشلة : جيل ؟ ..... أحياء ؟ ..... رأى ؟ ههههههههههههههههه
سمسم يا حبيبي انت نسيت إحنا ايه ... احنا خريجيين من سبع سنين ولسه قاعدين
شغل مفيش , سفر مفيش , جواز ههههههههه , الأسعار ... اللى اللى ... وتقوللى
الوحدة المعدنية .....اسكت ..... وبعدين وحدة ايه بين العرب ونص العرب ما
بيحبش النص التانى دا غير ان معظم الدول دى مفككة ومش عارفة تتوحد داخليا
..... سكوووووووووووووووووووووووووووووووت ....
سمسم : ياشباب وليكن .... نحاول نغير نفسنا ... أنا مش حقوللكم اطفوا السجاير
دى ونبدأ بنفسنا لا يا سيدى , أنا حأشرب معاكم ... ممكن سيجارة يا ضخم ؟
الشلة : ههههههههههههه ... آآآآآآه , قول كده , بقى حضرتك عايز سيجارة
ما تقول كده من الصبح , خد سيجارة اهيه يا سيدى وارحمنا بقى
سمسم : مساء الفل يا رجالة ..... سمعتوا آخر نكتة ؟
بيقولك مرة واحد قاللى عايز أكتب عن الوحدة العربية ههههههههههههههههههه
ممكن بقى حد فيكم يطلبلى شاى أصل أنا قابض النهاردة ورحت أعمل شوبينج
أسبوع واحد للبيت والمرتب خلص ..... وحدة يا وحدة .... على وحدة ونص
الشلة : قشطة يا سمسم .... هو ده الكلام
هناك ٧ تعليقات:
يااستاذ سمسم دى مش حال شلتك انت بس دى حال شباي مصر عندهم حاله ياس ولا مبلاه فوق الوصفكل واحد فيهبم مستنى انه يجاى حد يغير حاله بدل ما هو يسعى للتغير دى لا وكل واحد عنده احلام كبير اوىبس كل العليه انه يقعد ايده على خده من غير اى شغل ولا سعى البلد دى عمر حاله ما هايتغر من نفسه لازم كل واحد بجد بيداء من نفسه ان الله لا يغبر قوم ختى يغير ما بانفسهم
هي دي المشكلة .. الإستسلام السريع وخصوصا لما بنشوف إن المشكلة قدامنا عاملة زي الجبل الضخم
لكن لازم بندأ .. وطريق الألف ميل لازم يبدأ بخطوة .. وراها خطوة.. وراها خطوة .. وهكذا
والله فى سطور قليلة يا سمسم قلت كلام كتيير
لو جيت تبنى هتلاقى جيل كامل بيهد
واستحالة هتعرف تبنى طول ما اختيارك غلط
يعنى عايز تبنى تروح لواحد مقاول .. مش لعواطلية على القهوة
اختار صح صحبتك .. هتعرف بعدها تبتدى المشوار الصح
ولما تبتدى المشوار الصح ساعتها هتعرف تاخد فى ايدك دور الدومينو الى قاعد على القهوة
فهمت حاجة :)
تحياتى
الى السيد سمسم أما وبعد:
ياسيدى والنبى كلنا كده ماحلى الهجص والتهيس .احنا ماشاء الله أساتذة فيه.بس على قد محنا مسؤولين على حالنا .بردو مننساش باب حسنى ربنا يكرمة وكرماته على الشعب المصرى.يعنى بزتك شعب نسبه الامية فيه فوق الوصف .شعب كل الكلام ووجهات النظر بالنسبة له أحلى كلام.جايبو من عندو يعنى ولا هى سياسه وموجهه
يامراكبى
بنت من وسط البلد
بنت مصرية
اولا البردية تشرفت بيكم كأول ضيوف
ليها من المدونين
الحقيقة حنتظر اسامة صاحبى لما يرد هو على تعليقاتكم بخصوص قصته القصيرة
واكرر شكرى على الزيارة
والله انت باشا يا سمسم حطيت ايدك على نقطة الموضوع زى ما بيقول اللمبى بس انت بتتكلم على 90 فى الميه من شباب مصر طيب ولوا الشباب دول مقعدوش ع القهاوى هيروحوا فين مهو مفيش شغل وبعيدن اصاب القهاوى هيشتغلوا منين مهو لازم الشباب يكون عاطل علشان يشغلوا قهاويهم
الخلاصه الموضوع معقد وربنا يعينا ويعينك على الصبر
وحدة اةةةةة
وحدة جدااااااا
وحدة ومالوووووو
وحدة .......!
دة عشم ابليس فى الجنة
إرسال تعليق